5分鐘蒙召見証

第一次可以去到其他教會講蒙召見証，今次仲特登準備咗一個五分鐘既見証，好感恩可以同大家分享。

五分鐘蒙召見証

弟兄姊妹主內平安！我係瑞邦，而家係播道神學院道學碩士一年紀，好感恩從蒙召開始經過9年既糾緾，自己係上年終於行上呢條蒙福之路。自己蒙召同掙扎既過程可以用電影「一代宗師」入面一句說話形容，到習武之人會經過既三個境界，就係「見自己、見天地、見眾生」！

好，咁講番點樣「見自己」先！自己係2008年夏令會第一次蒙召，並且係獻心會立志奉獻做傳道。當時蒙召有兩段經文，第一段係提後4:2「務要傳道，無論得時不得時，總要專心」既上一句，「我在神面前，並在將來審判活人死人的基督耶穌面前，憑著他的顯現和他的國度囑咐你：」原來呢個有耶穌交付俾使徒，再由保羅囑咐提摩太既福音使命，係咁重要，係咁大。係神面前、審判活人死人的主面前、係佢既顯現和國度面前，想到呢度，眼淚就好自然流出黎。主俾自己睇見自己竟然一直都漠視傳福音，根本無當福音係真，係有關所有人將俾主審判咁去傳。

出營後，好快就見到「天地」。自己公司係從事高級單車既中港貿易，郁下都幾萬到十幾萬一架。就係出營後的數年間公司業蹟增長了50倍，人工三級跳。當時供應商遍及歐美，客戶則遍及中港台，就係不斷既拜訪入面自己跑咗好多唔同地方。自己作為開國功臣深得公司的戲重，事業上充滿足感。我發現咗自己既天地，但同樣困於自己發現的天地。

然而神無放棄自己，神係2015年既夏令會俾自己見到「眾生」。當年講員本身對穆斯林傳福音好有負擔，在令會中佢不斷播放同講解有關伊斯蘭既事情。當中特別有一幕係關於中東一個地方一個好傳統既伊斯蘭節日，佢地竟然係會用刀黎傷害自己，大人如此，小孩如是，全部都係血流披面。又或者係尼日尼亞，改信基督既穆斯林被人用火活活燒死。係啊，我先發現如來自己成功既小小天地以外，屬靈既爭戰仍然持續，唔在乎我賣幾多既單車，簽幾大張既單，亦唔在乎黃金寶李慧斯係咪踩緊公司牌子既車，更唔在乎今年D牌子係咪贏咗環法，好多人仍然活在無指望之中，被棄於救恩之門外。神就係咁樣俾我睇見佢既眾生，佢所愛既眾生，佢既天地。結果就係呢一個夏令會，係太太同我一同再次家庭奉獻，同心行上此路。

好記得16年底，自己同公司老闆通報要離職時，當時係用巨額既奬金希望我留低幫佢繼續打江山，我點回覆相信大家都會估到！轉眼間，入讀咗神學院半年，自己一家係呢條路上更加親密，一齊一點一點既去經歷神既豐富，深不可測既恩惠。

最後用我另一段當初蒙召經文黎勉勵大家 ，係但以理書12:2-3

12:2		睡 在 塵 埃 中 的 、 必 有 多 人 復 醒 ． 其 中 有 得 永 生 的 、 有 受 羞 辱 永 遠 被 憎 惡 的 。
12:3		智 慧 人 必 發 光 、 如 同 天 上 的 光 ． 那 使 多 人 歸 義 的 、 必 發 光 如 星 、 直 到 永 永 遠 遠 。

願榮耀頌讚都歸於天上的父同復活的救主耶穌基督！