再思彼得

繼續再思馬可14:27-42

好多時候我地將彼得唔怕與主同死既回應歸類為又係佢衰衝動，所以佢得個講字。咁樣諗其實都幾懶惰，如果肯再諗下成個故事，會對彼得有唔同睇法。

首先由離開加利利到上耶路撒冷，門徒已經察覺成件事係好異乎尋常：

1 耶穌離開加利利，其實係首先向北行，發生咗登山變像，先再轉頭向南行去耶路撒冷

2 南下時耶穌又揀咗條好奇怪既路，係要經撒馬利亞，一條猶太人絕不揀的路

3睇番拉撒路事件，門徒好明白上去靠近耶路撒冷既地方係好危險，佢地有必死既準備 (約11:16)

4 佢地開始帶刀而行，亦因為咁先會係客西馬尼發生斬人耳事件

5 最重要係耶穌呢個師父講咗三次自己要去耶路撒冷受死

去到耶路撒冷，仲奇異，見到耶穌日日係聖殿同人辯論，不單如此，除咗一直都唔妥既法利賽人外，耶穌更同聖城中極有權位的撒都該人都摃上了，仲要走去潔淨聖殿，將聖殿既管理階層都得罪埋，不論猶太政治同宗教高層人仕一次過得罪晒。

但，記住，呢一齊都唔係最令門徒詫異，因為我深信，我係彼得的話，我最接受唔到係耶穌係逾越節的晚餐第一次講佢既死因，係因為有自己人，門徒當中有人出賣佢。

彼得作為門徒之首的，根本無法明白同接受一班朝夕相對，同甘共苦既好兄弟中有人會出賣耶穌，特別大家都共鳴心志，明知耶路撒冷係險地都要帶刀而上去。但主耶穌卻是如此斬釘截鐵的說出有門徒要出賣他。

彼得就是帶住這種疑惑、不信、不滿的心情出發往橄欖山，進入14:27-42既場景。亦因為帶住呢種心情，先會當主耶穌更進一步講佢地要全部跌倒離棄主，彼得先會咁大反應地回應自己絕不跌倒及絕不離棄主。係彼得黎講，主第一次話佢地當中有一個會出賣佢已經係差不多係佢心口打咗一拳，主第二次更進一步話佢地全部會跌倒就更加係再黎個double punch。

但主愛彼得，所以俾埋第三拳佢，就係係眾人面前要當面指出彼得會三次不認主。如果諗深一層，晚飯耶穌先講門徒中間有人要出賣佢，無隔幾耐就係眾人面前話彼得今晚會三次不認主，你係門徒你會點諗彼得。

整個場境，係為彼得而設，為要挽回，造就一個耶穌死後能夠堅守主道，唯主是首既一代使徒首領。

完咗橄欖山既場景，跟住再入客西馬尼，又係呢一幕，你可以同樣問一個問題，點解更多人瞓，就係13:37係都要淨係問彼得，係都要同佢講佢心靈願意，肉體軟弱？

如果馬可真根據彼得所言寫下馬可福音，呢一齊就真係好有趣！